ҚР Президентінің Жарлығымен Оралов Асхат Раздықұлы ҚР Мәдениет және спорт министрі қызметіне тағайындалды.
«Қазқайтажаңарту» РМК Асхат Раздықұлын Қазақстан Республикасының Мәдениет және спорт министрі болып тағайындалуымен шын жүректен құттықтайды.
Еліміздің мəдени-əлеуметтік дамуы жолындағы ізденісті еңбегіне толағай табыс тілейміз!
Кез келген дәуірді алсақ, сол өркениеттің белгілі бір мәдениеті мен салты, әдет-ғұрпы болады. Тарихымыздан сыр шертетін көне тарихи-мәдени ескерткіштер мен жәдігерлер қазіргі таңда баға жетпес құндылығымыз екені айғақ. Еліміздегі бірқатар төбемізге көтеріп жүрген тарихи мұраларымызбен ескерткіштерімізді сол жағдайында сақтап қалу үшін 1972 жылы 29 наурызда «Қазқайтажаңарту» мекемесі құрылған болатын. Биыл Кәсіпорынның құрылғанына 50 жыл толып отыр. Осыған орай, Жамбыл атындағы Қазақ мемлекеттік филармониясында Кәсіпорнымыздың 50 жылдығына арналған салтанатты жиын ұйымдастырылды.
Салтанатты шарада Кәсіпорын туралы бейнеролик көрсетіліп, дәстүр бойынша күмбірлеген күймен ашылды.
Алғы сөзді бастаған Кәсіпорынның бас директоры Махаббат Бигельдиев ғылыми- реставрация бағытындағы жұмыстардың маңыздылығын баяндап, ұжым қызметкерлерін елу жылдық мерейтоймен құттықтады. Ұлт игілігі жолындағы еңбектеріне толайым табыс тіледі.
Одан әрі, Бас директор ұлттық мәдени мұраны сақтауда, ғылыми-реставрация саласының дамуына үлес қосқан азаматтарды «Қазқайтажаңарту 50 жыл» мерейтойлық медалімен марапаттады. Сәйкесінше, Кәсіпорын ардагерлері ардақталып, құрмет көрсетілді.
Сонымен қатар, әріптестерімізге саланың тұрақты дамып, өркендеу жолында сіңірген абыройлы еңбегі мен елеулі үлесі және белсенді қызметі үшін Қазақстан Республикасы Мәдениет және спорт министрінің м.а Серік Жарасбаевтың алғыс хаттарын табыс етті.
Салтанатты рәсім барысында мерейтойға арнайы шығарылған «Қазқайтажаңарту 50 жыл. Жаңғырған тарих» атты кітабының тұсауы кесілді. Бас директор Бигельдиев Махаббат Садуақасұлы, кәсіпорынның ардагері Тұяқбаев Қанат Қымызұлы, ЮНЕСКО Кластерлік бюросының өкілі
Халафова Айгуль арнайы сахна төріне шақырылып, кітаптың тұсауын кесті.
Бұдан өзге, жиын шақырылған қонақтардың ыстық лебізімен жалғасып, филармонияның өнерпаздары ән мен жырдан шашу шашты.
«Қазқайтажаңарту» – тарихи мұралардың шырақшысы. Тарих дегеніміз өткен күн ғана емес. Ол – болашақ. Біздің міндет – оларды сақтап, келешек ұрпаққа аманаттау.
Той тойға ұлассын! Мерейтой құтты болсын!
Отырар қалажұртындағы 2020-2022 жылдарға жоспарланған «Отырар қалажұртын зерттеу, консервациялау және ішінара қалпына келтіру» атты жобасы бойынша Қазақстан Республикасының Мәдениет және спорт министрлігінің тапсырмасына сәйкес “Қазқайтажаңарту” мекемесі Отырар қалажұртындағы зерттеу жұмыстарын ұйымдастыруды және нысандарды реставрациялау мен консервациялау жұмыстарын жүзеге асырды.
Соның нәтижесінде үш жылдық жоба бүгін өз мәресіне жетті.
Жобаның жалпы мақсаты - Отырар қалашығының оңтүстік қақпасымен солтүстік-шығыс қақпасын бір біріне байланыстырып жатқан негізгі көшенің бойындағы қоғамдық орындарды және жеке меншік сияқты нысандарды аршу, оларға реставрациялық, консервациялық жұмыстар жүргізу және оларды ашық аспан астындағы музейге айналдыру және келуші туристерге қолайлы жағдай жасау болып табылады.
Салтанатты шараның құттықтау сөзі Қазақстан Республикасы Мәдениет және спорт министрі Дәурен Абаевқа берілді.
Өз сөзінде , аталған жобаның мақсаты мен маңызына тоқталып, жоба аясында жұмыс жасаған барша қызметкерлерге алғысын жеткізді.
Содан соң, «Қазқайтажаңарту» мекемесінің бас директоры Махаббат Бигельдиев Отырар қалажұртындағы жүргізілген ғылыми- реставрациялық, консервациялық, археологиялық қазба жұмыстарының нәтижелері мен музеефикациялық жұмыстардың ретін таныстырып өтті.
2020 жылы бастау алған Үш жылдық жобаның маңыздылығын айта отырып, жүйелі түрде жүргізілген реставрациялық жұмыстардың нәтижесі бүгінгі күні көпшіліктің назарына ұсынылды.
Бұдан өзге, іс-шараға ҚР Мәдениет және спорт министрлігі, музей басшылығы, шетелдік және еліміздің тарихшы ғалымдары мен археологтары, туроператорлар мен БАҚ өкілдері қатысты.
Президент Қасым-Жомарт Тоқаев Алматы қаласындағы жұмыс сапары барысында ағартушы, ұлт ұстазы Ахмет Байтұрсыновтың мұражай-үйіне барды, деп хабарлады Ақорда сайты.
Мемлекет басшысы музейдегі «Ұлттық рухтың ұлы тілі», «Қазақ санасының шамшырағы» және «А.Байтұрсынұлының жұмыс кабинеті» залдарындағы экспозициялармен толықтай танысып өтті.
Жалпы, музейде ұлы қайраткердің өмірі мен шығармашылығына байланысты барлығы 500-ге жуық экспонат жинақталған. Биыл мерейтой қарсаңында “Қазқайтажаңарту” кәсіпорны музей-үйде ғылыми-реставрациялық және музеефикация жұмыстарын толығымен жүзеге асырды.
Сонымен қатар , Мемлекет басшысы Ахмет Байтұрсыновқа арналған ескерткіштің ашылу салтанатына қатысты. Салтанатты жиынға ғалымның туған-туыстары мен шығармашылық зиялы қауым өкілдері қатысты.
Түркістанда Қожа Ахмет Ясауи кесенесінің техникалық жай-күйін зерделеу жөніндегі жұмыс тобының қорытынды кеңесі өтті
Отырысқа ҚР Президенті Әкімшілігі басшысының орынбасары Аида Балаева, ҚР Мәдениет және спорт вице-министрі Нұрғиса Дәуешов, Түркістан облысы әкімінің орынбасарлары және ҚР Мәдениет және спорт министрлігіне бағынысты мекемелердің өкілдері қатысты.
Жиын барысында Аида Ғалымқызы кесене ғимаратымен танысып, мамандардың баяндамаларын тыңдады. Отырыс барысында мәселелерді шешудің түрлі жолдары ұсынылды.
Өз кезегінде, ҚР Мәдениет және спорт вице-министрі Нұрғиса Мұратұлы баяндама жасап, министрліктің Қожа Ахмет Ясауи кесенесінде туындаған мәселелерді шешуге және оның сақталуын қамтамасыз етуге бағытталған жоспарды таныстырды.
Сонымен қатар, “Қазқайтажаңарту” мекемесі Кесенені сақтаудағы Арнайы зерттеу бағдарламасының іс-шаралар жоспарын ұсынып, толыққанды комплексті зерделеудің маңыздылығын атап өтті.
Страница 9 из 36